زبالتك فى جيبك مش فى الشارع (1)

على سيرة إنك ترمى الزبالة بتاعة سيادتك فى سلة المهملات..أو تخليها فى شنطتك أو جيبك لغاية ما تلاقى سلة مهملات ..ما أنت شايل برده علبة السجاير فى جيبك ..مفيش فرق يعنى الاتنين (احم احم)

*كلمة على الهامش ..

الدعوة لرينا مش مجرد انك تقعد تكلم الناس كل شويه عن ربنا و عن الرسول و الاسلام و ....لغاية ما الناس ما تزهق منك اصلا

انما فى إن الناس على الاقل تشوف معشار اللى بتتكلم عنه ده فى افعالك... و تحس ان الالتزام غيرك عن زمان...

يعنى بدل ما كنت سيادتك معفن و غاوى ترمى الاكياس على الارض.. و تتنطط فوق علبة الكان.. و تشوطها برجلك... تلاقى على الاقل انك بقيت نظيف و بترميها فى الزبالة زى الناس المحترمه ....

رغم انك تحس لما تعمل كده ان الناس بتبص لك على انك E.T .. من كوكب تانى ..

على اساس ان الزبالة اللى فى الشارع فى كائنات فضائية هى اللى بترميها..مش احنا اللى اتعودنا على كده للاسف ...

زجاجة المياه..علبه العصير...ورقه ...كيس شيبسي .... ورقة البونبونى ....حط دول على بعض يتكون لك فى الاخر مقلب زبالة

ساعتها الكلمه الواحده منك....هيكون لها اثر كبيرررر عن المحاضرة الطويله اللى انت بتسمعها للناس

افتكر ان النبى(صل الله عليه و سلم)  قبل الرسالة كان اسمه ايه .....

 الصادق..الامين...

صحيح ...مقولة " النظافة من الإيمان ...مش حديث
بس ميمنعش إن " ..إماطة الأذى عن الطريق" حديث

#التوحيد_الاخلاق_الجهاد

زبالتك فى جيبك مش فى الشارع  (2)

على سيرة إنك ترمى الزبالة بتاعة سيادتك فى سلة المهملات..أو تخليها فى شنطتك أو جيبك لغاية ما تلاقى سلة مهملات ..

النظافة مش فى ان حضرِتك قدام صحباتِك تطلعى المنديل و تستخدميه و تحطيه فى الشنطه ... او ان حضرتك و انت فى الكليه ماشى مع زميلتك (الأخت فى الله  ) تفضل شايل زجاجه المياه ( اللى الكل عارف قصتها فى المواسم و الكليات و صحابك بيقولوا لك بعدها الله يرحم جدك اللى مات فى الغربه لانه معرفش يقول كلمة water ) لغاية ما تلاقى سلة مهملات و ترميها ... اااووووووه شاب نظيف

لا ...إن ده يكون سلوكك قدام الناس ...و من وراء الناس ...

ان صاحبك و هو معاك لما يرمى علبة عصير على الارض اللى فى الغالب سالف ثمنها منك عشان يجيبها من الكشك ...بكل هدوىء انت تشيلها من على الارض من غير كلام كثير معاه ... و تدور على مكان ترميها فيه ...لا انت احرجته كده ...و فى نفس الوقت ...هو فهم الدرس بادب و شياكه منك .... مفيش مانع بعدها انك تطلع عينه و تعرفه انه معفن شويه ... و نصيحه لو مش هتستحمل التريقه بلاش تعمل كده معاه ...لانه هيحسسك ان انت اسمك نوال بعدها
راكبين عربيه و شاريين حاجات من اى كشك .... جمعوا الزباله كلها فى كيس ( فى الغالب لون الكيس اصفر مش عارف ليه ..بس اعتبره كشك ضد الانقلاب ) .. و اول واحد من الشباب راكب استنطاع عشان يوصل لبيته..ياخد الكيس فى ايده يرميه (مش فى الشارع ) ...لا فى الزباله ....

و ان سيادتِك مش عشان محدش شايفك...تروحى راميه مناديلك فى الشارع...و منظفه شنطتك اللى عبارة عن صندوق الدنيا فيها كل حاجه من الابره للصاروخ .....احم احم و مش هنتكلم على الحاجات التانيه..... لا ان ده يكون سلوكك عشان انت مقتنعه بكده...مش عشان الناس و شكلك قدام صحباتك ...

و هنقول من تانى
مقولة " النظافة من الإيمان ...مش حديث
بس ميمنعش إن " ..إماطة الأذى عن الطريق" حديث

#التوحيد_الاخلاق_الجهاد
#اقتنعوا_بنفسكم
#خليك_واحد_طول_الوقت

#زبالتك_فى_جيبك_مش_فى_الشارع (3)


لما تبص لموضوع الزبالة و ليه فى الشارع مش فى جيبنا لغاية ما نلاقى سلة مهملات ... على الاقل ...

او ليه فى مننا بيعمل كده قدام الناس ... و مجرد انه لو مش لاقى حد فى وجهه...عادى يرمى على الارض ...

هتلاقى حاجات تضحك فعلا ...

يعنى مثلا المحافظ او رئيس الحى ...و محدش يدخلنا فى سيرة أنهم فى العادة من العسكر ... خلينا فى الزبالة مش الانقلاب ... على الرغم من أنهم الاثنين واحد ..

المهم....
تلاقى سيادته لو هو ماسك حى من الاحياء الراقيه ...مهم عنده كل ما يعدى بعربية سيادته.... مهم جداا يلون الرصيف ..ابيض و اسود..حتى لو مدهون الشهر اللى فات...

و الغريب انه يدهن من غير حتى ما يراعى اصول الصنعه فى التقشير و المعجنه ...لا عادى ارمى بويات على الارض من فوق الوجه و خلاص ...
و اهو كله لمقاول الباطن ... يا بخت من نفع و استنفع ... و مش هنقطع على ارزاق بعض ...

رغم ان ممكن يكون فى الشارع اللى وراء رئاسة الحى..المجارى طافحه من سنه .. او الشارع مكسر..بس عادى المهم المظاهر و خلاص و سيادته هو بيعدى...

او على الناحية الثانيه..لو حى شعبى  ..يقولك لان ده حى راقى فطبعا سكانه اولاد ذوات و هيحافظوا على المكان ... بعكس العالم ال @#$%&^% اللى فى الاحياء الشعبيه ... مش مهمين 

طب ده يا سيدى رئيس الحى...طب تعالى انت بص على نفسك فى البيت انت و الاسرة الكريمة ... متخافش انا مؤدب و مش هقول كلمه عيب...عشان عارف ان لسانك مش هيعتقنى ...

المهم بص على شقتك دلوقتى كده و على العادة المصرية ... المهم يكون شكل الصالة نظيف جداااا ... و متروقه...حتى لو الشقه و اوضتك مقلب زباله ...

ده طبعا على امل ان فى ضيوف ممكن يجوا فى اى وقت ...رغم انك لو ركزت شويه هتلاقى ان نص الاقارب مقاطعين بعض من قبل الانقلاب ...بسبب ان مش عارف علانه بصت لفلانه من 33 سنه كده على قصة شعرها ... و ان عمك مش عارف عمل ايه ... المهم سيبك

و ان النص الثانى انت برده هتلاقيك قاطعته بسبب انت ربعاوى و لا سييسي و كده ....

الشاهد من القصه كلها ... ان حتى فى بيوتنا ... النظافه مش اسلوب حياه اكثر ما هى مظاهر ... انت مفرقتش كثير عن رئيس الحى الفاسد ...

هو بينظف فى الشكل العام ...عشان لما يعدى المحافظ .. و المحافظ بيرصف و يلمع نفس الطريق اللى كان بيمر فيه الرئيس كل سنه...

و انت نفس الكلام...اوضتك مقلب زباله يا #%$#$%% ... و الصالة شكلها نظيف عشان الاغراب ...اللى انت منتظرهم يزوروك ..و اللى ممكن E.T يزورك قبلهم 


#انظفوا_لنفسكم_مش_للناس 

#اتغير_لنفسك_مش_للناس